22‏/02‏/2007

ملك


أنا كنت ذات مرة ملك
لكني صرت كتابة
جاهي وزماني اتهلك
والصحبة كدابة
يا ميت ندامة على قلبي اللي كان بيقش
دلوقتي يا قلبي يا عش القش
خايف من الضلمة
من الفرقة
من أمنا الغولة
واقف وحيد ببكي بحرقة
وعيونكو مسئولة
دنا قلبي كان ف يوم محجّ لْكُم
وكنت اسافر ياما وباجيلكم
أنا قلبي كان ف يوم ممشّاكم
إيه اللي صار
وايه اللي مشاكم ؟
دنا كنت ذات مرة ملك
لكني صرت كتابة
آه يا عيون خاينين
ويا ضحكة كدابة

هناك 13 تعليقًا:

FATMA يقول...

اه يا عيون خاينين
و يا ضحكة كدابة
انت اللي ساذج عشان صدقت يا ملك قصدي يا كتابة

غير معرف يقول...

سلام عليك ولد.. شكلك دايس لجوة، دووووس

كراكيب نـهـى مـحمود يقول...

جميل اوي كالعادة
وحزين كالعادة

غير معرف يقول...

مزيكا حزاينى فعلا

انا متابعاك من فترة فاستمر فان مزيكتك بتطرب قلوبنا

محمد صلاح العزب يقول...

واحشني جدا يا محمد

لا أحد يقول...

انا لدور عليك من فترة و الحمد لله لقيتك النهاردة
كنت قريت لك زمان " يوما ما ستقرأ سوزان هذه القصيدو " و اختفيت او انا اختفيت بس الحمد لله لقيتك

انا بس عايز اقولك
لقد قرات سوزان القصيدة

مـحـمـد مـفـيـد يقول...

الله عليك يا ملك
بجد روعه اوي والشجن اللي فيها رائع واستمر لمسلسل الحزن

صاحب البوابــة يقول...

عزيزي

صدقني رائع انت كعادتك ...

ورغم اني بعيد منذ فترة طويلة عن التدوين ...

الا اننى لم امنع نفسي من المرور عليك عندما عدت الى هذا العالم ...


تحياتى وحقاً انا اشتقت الى كتاباتك ...

غير معرف يقول...

ازيك يا محمد

جميل يا محمد

الصحبة بقت كدابة

و الملك أصبح كتابة

عموما ما بقاش فيه لا ملك و لا كتابة

و شكرا

محمود فهمى يقول...

انت هتكتب عاميه ولا ايه

saso يقول...

مختلفة عن اللي قريتة ليك هنا
يمكن اجرأ في اللفظ حبه، دايما كلامك قريب للناس ومتاخد منهم
هنا حسيت اني في جو ملفاتك عن المترو والرصيف والاسطح والشوارع

لغتك عجباني اوي .ما شاء الله عليك

أنا قلبي كان ف يوم ممشّاكم
إيه اللي صار
وايه اللي مشاكم ؟

دي فعلا رائعة منك. قفلة الشطرين دي بحبها جدا من اول ما قريت مربعات كنت باشبط في الحكاية دي وادور عليها في كل بيت وافرح لما القاها في غير شعر المربعات

***
مش هاكتبلك عن كل شطر هاقولك ان كلها حلوة جدا

محمد أبو زيد يقول...

توتة تونة

كلنا ف لحظة لازم نبقى ساذجين
برضانا
أو غصبن عنا

عمر مصطفى
شكرا يا جميل

نهى
كالعادة
الحزن أصبح عادة

مي
شكرا لك يا مي
وشكرا لزياراتك الجميلة

محمد صلاح العزب
واحشنهي أكتر يا محمد
وأكيد هنتقابل قريب

لا أحد
أنا فعلا بدور على سوزان بقالي كتير
ومش لاقيها

محمد مفيد
الجميل دائما
شكرا لروحك

صاحب البوابة
عود أحمد


محمود فهمي
أيوه ، أنا نويت أخد نوبل شعر العامية منك

زيان
انت فين يا عم ؟

ساسو
سعيد بكلماتك
شكرا لك

Dananeer يقول...

هيه متاخره اوى بس
انا لسه قارياها
حلوه اوى بجد
حزينه و بتوجع و حلوه