04‏/10‏/2006

على قيد الحياة


وما تنساشي
تسأل عني ف باب الخلق
مستنيك
وبقالي سنين قاعد نفس القعدة
نفس الشاي السادة
نفس البصة على التليفزيون
نفس الكتب النايمة ع الترابيزة
نفس الصرخة بتتمدد حواليا

مستنيك
ولما هشوفك مش هسأل
ليه سبتني وحدي في مرايتي
من غير مصحف ع الشيفونيره
من غير سكر في المطبخ
من غيرك
صوتك يتسحب واحدة واحدة
والنظرة تكش واحدة واحدة
ونا برضه قاعد مستنيك
حلقس مش ناشف
حلقي ممرر

مستنيك
تالت شعر تحود حتلاقي قدام منك وشي
مستنيني زي ما أنا مستنيك
الشباك مش مقفول
لكن شكله كدهه
والصبح ما صفرش لبنات شايله شنطها
وراجعة م المدرسة بدري
ما سألهمشي ليه
أنا مصلوب وحدي
في عنين بياع الجراين السهرانه
متعلق من شعري على بوابة المتولي
زي فانوس ميت بالظبط
إبر الخيامية بتلون عيني بالدم
فما تسألنيش
واما استناك وما تجيش
هحكيلك وأوصيك
إنك تسأل عني ف باب الخلق

مستنيك
ولا أقولك .. ما تجيش .

هناك 12 تعليقًا:

Ghada يقول...

انتزعت مني تنهيدة..

الفقرة الأولى والتانية عصية على الوصف.. جميل المعنى اللي ورا التفاصيل، ومؤلم قوي!

سَيد العارفين يقول...

yaaaaaaaaaaaaaaaah ya mohammed ,

تاني مرة أقرالك و أبقي مش عارف أقول ايه ......... ربنا يكرمك

بس كلامك بيوجع يا محمد يا جميل

بهاء الدين رمضان يقول...

قصائدك العامية لا تقل أهمية عن الفصحى
تربكنا دائما وتعلق في داخل ستائر الحلم والشجن الجميل
لا حرمنا الله منك

Epitaph يقول...

*sigh*
.....wtg our great poet....!!!

seifbl يقول...

يا صديقى الجميل باين عليك كنت محجوز تحرى فى مديرية الامن فى باب الخلق,ولذلك كتبت هذة الابيات البديعة.

Bassma يقول...

جميله خالص

Dananeer يقول...

حلوه بجد يامحمد
و ليه بس بعد ده كله ميجيش ".

غير معرف يقول...

http://www.jidar.net/jed/modules.php?name=News&file=article&sid=1167&mode=thread&order=0&thold=0



يا مولانا

فقدت موبايلي بكل سرور وطارت ارقام جنابك حاول ترسلها على الميل


محجوب اللاوندي

مـحـمـد مـفـيـد يقول...

والله يا محمد دخلت لقيت تعليق واحد
وكل شويه ادخل اقرائها واخرج ومش عارف اقوللك ايه من الروعه
والله العظيم قصيده صلاه الخوف بترن في وداني من يومها ولحد دلوقتي
ابعتها بقي لو بتعزني

saso يقول...

مفرح ليا مش مؤلم... تفاصيل والوان واركان وورق ولحم ودم

H Y M N S يقول...

: ) فـ الصميمـ

مصـ( الخير )ـعب يقول...

بتوجع أوي يا محمد..
و أنا كنت ما صدقت ابتديت أهدى شوية ..
ربنا يسامحك..
بس تعرف..
أنت قلت اللي أنا عاوزه