01‏/06‏/2008

صلاة الخوف



يا أيها المزمل
الخوف شلل وانت اللي مزّمِّل
هذا الطريق واعر صعيب
راح تمشي وتْكَمِّل
ولا ح ترجع للوجل تبكي وتتجمل
قبل الدخول رتِّل
يا أيها المزمل

البحر واخدني لموجة ف إثر موجه
والشط مش غازل أمل
وعصايتي مش عوجه
عصافيري طرشه زي انا برضه
ما بسمعشي
ندا غير الوطن يصرخ من الحوجه
وبيهمل
يا أيها المزمل

هذا الوطن ساب العيون وْ هَْج
ونا قلبي وقت امّا صحي
اترج منُّه رج
طالع لفوق سابع سما
نازل لسابع فج
وعد اللمون خاف فانطفى
والنور رفض يرجع يفج
هو البكا يا عين دوا يرجع لي أوطاني محج
ولاسلاحي اللي دبل
ولا هعاود للسرير الدافي واتزمل
يا أيها المزمل

صلوا على خير الأانام
أنا طه جاني في المنام
خلص الكلام
والنور حمام
رفرف في وشك يانبي
غرقني ضيّك في هواك
رجعني من تاني صبي
ضحك الصباح لما التقى نورك بيرمح في الفضا
بيوضي مطرح ما خطا
سجد المدى
شكرا لرب الكون لإنه أبصرك
نادى عليك : ما أجملك
ما أطهرك
وناديت أنا:
قتلوا البراق اللي حِبِل شمسين ليا
سكروا بدموع الأوليا
طفوا تاريخ الأنبيا
فوق الشفايف
أما أنا
أنا اللي خايف
مني أنا
جسمي طليق والخوف أنا
الخوف حيطان جوايا تتهدّش
الخوف وطن وسجون ما تتعدش
الخوف خرس تسمع وما تردش
الخوف قانون حدِّشْ يِكَلِّم حَدِّشْ
الخوغ بيتفتش
أنا أعمى لكن شايف
أنا .......
..........أنا خايف
نظر الرسول وطول النظرات .. بِعِدْ عني
وجريت عليه
كان نفسي لو آخده في حضني
نفسي يجاوب مطلبي
نفسي أقوله يانبي
دثّرني زمّلني
كمان رقيني واحميني
كمان انصحني علمني
دنا جسمي بدا ينمل
قال الرسول اوعاك تخاف اوعدني تتحمل
اقرا ياسين وسورة المزمل
رتل ورايا وبعدي كمل
يا أيهاالمزمل

يا أيها المزمل
قم من فراشك ..ليه تخاف
جبريل أتى بالوحي والأعراف
أصرخ في مكة الله أكبر
كل الآيات حواليك أهي تتشاف
انظر لتتأمل
يا أيهاالمزمل

أهجر كهوف خوفك
اوعى البكا يشوفك
علق مشانق للعيون اللي بتبكي في الصحا والنوم
بكفايه نوم
امتى بقى هنقوم
يا أرضنا يا تمر حنة
إي والنبي
دنا نفسي أتحنى
لمي غنا نايك على شفتك
هيا اسمعي راح اقول على إسمك
على صفتك
ضحك البلابل قد طرح مواله جوايا
يا أحلى محكايا
إديني حكّيوه
واديكي غنيوه
عن حلم جوايا بيتجمل
وعنيه هترتل
يا أيها المزمَّل
إوعىتخاف تأمل
يا أيها المزمِّل
إنهض وقوم كمل
يا أيها المزمل
ــــــــــــــــــــــــــــــــــــــــ
2002

هناك 6 تعليقات:

soha zaky يقول...

أهجر كهوف خوفك
اوعى البكا يشوفك
علق مشانق للعيون اللي بتبكي في الصحا والنوم
بكفايه نوم

مـحـمـد مـفـيـد يقول...

يااااااااااااااااااااه
بجد فرحت جدا بنشرها
مش هنسي اول لقاء لينا وانت بتقولهالي وقد ايه عجبتني ومش سبتك الا لما كتبتهالي وبعتهالي علي الميل
سعيد بطرحها وسعيد بهذا اللون الخفي في شجنك المتواصل

الخوف حيطان جوايا تتهدّش
الخوف وطن وسجون ما تتعدش
الخوف خرس تسمع وما تردش
الخوف قانون حدِّشْ يِكَلِّم حَدِّشْ
الخوغ بيتفتش

طبعا انت عارف الجزء ده انا قلت عليه ايه

غير معرف يقول...

جميله جدا يا محمد و أنا آخر مرة كنا تقايلنا فيها من فترة كبيرة في وسط البلد سمعت جزء كبير منها و بعد ما مشيت قلت لنفسي يا ريت كنت قدرت اسجل اللي انا سمعته بصوتك و لكن اتلحقت و ادينا شوفناها مكتوبة و انا سعيد بيها قوي.

زيان حسن

أسما عواد يقول...

رائعة جدا يا محمد
أنها القصيدة التي سمعتك تلقيها في التلفزيون في برنامج كنت فيه مع الطاهر شرقاوي أليس كذلك
كنت مجنونة بها ساعتها واستمتعت أكثر بإلقائك لها وها أنا اجدها أمامي اسمح لي ان انشرها في مدونتي
تحياتي أيها الحزين

غير معرف يقول...

يا صاحبى إنى حزين طلع الصباح فما ابتسمت ولم ينر وجهى الصباح، كنت مع مفيد امبارح وقطعنا فى فروتك شوية لكن بجد واحشنى قولت اتصل بيك واحنا قاعدين لاقيتك غير متاح
عايزك تبقى متاح شوية وأشوفك ونتكلم عن الشعر والشعرا والدنيا والكون
أحسنت ولسه فى كتابة العمية الموزونة أحسن خليك فى الموزون هاتبدع فيه يا نجم
أحمد عبد الجواد

حسن عبدالموجود يقول...

جميل جداً يا محمد ولو انها متأخرة جداً :)