نهار أسود

الضلمة في عيون الحرس
متقفّلة كل البيبان
وضريح يتيم من غير ولي
كل البنات بارت
وعيونكو هيّاها العسس
يا خَيْبِة الأيتام إذا حاولوا الهرب
متقَفّلة كل الحيطان
نازفة بارود مش مِسْتِحِي
ساكتة كما كدب الجرايد والغنا
بتبص مني عيون وطن
مدبوح أنا ..
.. ولا انا لسّه كوم تراب
الخيل عذاب بيجُرِّني
طباشير على وش الهوا
لا عرفنا نكتب غنوتين
ولا يوم حفظنا آي ياسين
تبقى الحكاية مْلَفّقّة
والشعر مش ضحك ونسيم
الشعر مرمي في القفص


يا صحابي
يا خيبتي القوية
طلع الأدان زيّ الخرس
طلعت ودانّا مصَمّغة
متعلقين كيف الدبيحة الــــ
(مش جبانة )
والدمع صوته مش طرب
صوتي اتنقش فوق البحار
طعمين لّجَنّيّة
أما الخرس كان القروش

( وصاني قلبي بالوطن
فجرحني وردي
شوكي عجين ميت ما يتاكلش
عكّرتْ روحي بالقصيدة واتخنقت
كان الوطن مرمي على الكورنيش
ما بين بنادق أمن دولة وبين قلوبنا )

البحر خنجر لو تشوفه تعشقه
مترصصة رملة عروسته بالأنين
من غير حرس
قلبي انطفى
لما اتملى ببارود عسس

( ما تجيش وحيد من غير أبوك
ما تجيش وحيد من غير وطن )

هفضل أحاربك للنهاية
للشموس اللي انطفت
رشيت مخاض الشعر في وشي
انتفضت
وِطِرْت في عيوني سكنت
خَضِّتني لما شفت إيدك بين إيديك
سودة نجس
يا مقفلين كل البيبان
يا قاتلين كل القصايد والحسان
بصوا وراكم
..... واشتموا